LEGENDA SEDEKAH GUNUNG MERAPI

Argo Merapi mujudaken satunggaling Argo ingkang gadhah bobot ingkang inggil tumraping tanah jawi minggahing nuswantoro, kasusra dumugi ing tataran bawana awit mujudaken hardi ingkang asring piyambak muntahaken lahar ingkang ateges gunung berapi ingkang paling aktif ing donyo mila boten mokal menawi anggadahi daya tarik ingkang kiyat tumraping para nara wisata ugi anggadhahi sesambetan ingkang raket kaliyan para raja ing tanah jawi, ingkang saklebeting mitos ugi wonten sesambetan kaliyan Ratu kidul ingkang dipunpitados dados ratuning lelembut ing segara kidul. Mila nama jumbuh menawi ing Argo Merapi mujudaken papan ingkang kathah ngemot kawontenan-kawontenan gaib.

Derek punapa ingkang dados gotheking ngakatah awit saking pangandikaning para leluhur duk ing kina makina gethok tular turun temurun ngantos dumugi ing titi wanci punika kathah kedadosan ingkang kasad mata menapa dene ingkang boten kasad mata, kathah dumados ing ardi Merapi. Ingkang sedaya kala wau damel satunggaling raos kapitadosan tumrap wargo Selo mliginipun lan warga masyarakat umumipun.

Kapiji satunggaling kadadosan ing kala rumiyin Kasunanan Surakarta wekdal semanten ingkang kepareng agasto jejed wengkuning praja Sampeyan Dalem Ingkang Sinuhun Pakubuwono ing kaping enem (6), inggih Sinuhun Bangun tapa, kepareng asring tindak mertinjo argo Merapi ingkang sayektosipun, kejawi tindak mertinjo lan ameng-ameng ing argo Merapi-Merbabu ingkang tuhu edi endah. Ugi wonten kepareng dalem ingkang sinandi nuwun inggih pepangihan winandi kaliyan Pangeran Diponegoro, saperlu paring bebantu anggenipun Pangeran Diponegoro perang lumawan Walandi. Dados kacetha ingkang Sinuhun Pakubuwono kaping VI, bidho apirowang dhumateng penjajah Walandi ing wekdal semanten.

Menggah pepanggihan winandi ing antawising priyagung kekalih mapan wonten ing satunggaling gua ingkang sapuniko sinebat Gua Raja. Tindak Dalem Sinuhun ingkang mekaten wekasanipun kadenangan dening Walandi, awit wonten palapuran saking satunggaling Bupati. Tumuli ingkang Sinuhun dipun cepeng dening walandi saha dipun selong wonten ing Ambon. Inggih awit lekas Sinuhun Pakubuwono VI ingkang mekaten sasampunipun Indonesia mardika Sampeyan Dalem Sinuhun Pakubuwono VI Sinengkaaken minangka satunggaling Pahlawan Nasional. Menggah sesambetan antawising Kraton Surakarta menapa dene Ngayogyakarto kaliyan argo Merapi lumintu dumugi sangriki, ing wanci-wanci tinamtu ngawontenaken larung sesaji ing Merapi.

Kacariyos malih sesambetan kapitadiosan masyarakat dumateng satunggaling priyagung ingkang asma Kyai Petruk asma Timuripun Piadegipun Handoko Kusumo awit dedeg piadegipun inggil kados piyayi Petruk ing pewayangan lajeng katelah asma Kyai Petruk sinebat ing kathah bilih Kyai Petruk mujudaken Putranipun Pengangeng kapaniwon Cepogo. Wiwit timur panjenenganipun gentur kasutapanipun remen tetulung dateng sesamining ngagesang wicaksana tuwin waskitha ing pamawas, turto jujur lahir batosanipun, linambaran sekti mandra guna.

 Inggih awit saking kawontenan ingkang mekaten dening masyarakat Selo lan sakkiwa tengennipun gadhah kapitadosan, bilih Kyai Petruk saget angayomi, masyarakat tlatah Selo ing sakiwa tengenipun saking pangamukipun Hardi Merapi. Ugi pinitadhos Kyai Petruk seda lan mukswa ing Hardi Merapi. Ingkang menika kagem memule angromati Kyai Petruk, masyarakat Selo saben ing malem 1 Suro ngawontenaken sedekah gunung tuwin larung sesaji, ingkang wujudipun : tumpeng sesaji, sekul gunung kadamel saking jagung, brubus kadamel saking roning lumbu, gomok, acung – acung, bhotok sempuro kanthi dipun jangkepi uba rampe palawija jangkep, singkong baker telo rambat baker, unjukan kopi, jadah baker, rokok klobot, rokok gudang garam kretek, pisang raja, sekar kanthil, kunir saha tigan, arta Rp. 100,- kemeyan saha mliginipun sirahing Maheso ingkang kalarung ing hardi Merapi.

Sedaya kala wau mujudaken sarana nyenyuwun dhumateng gusti ingkang akarya laka, mugi kepareng paring karahayon tuwin kabagyan dhumateng mliginipun masyarakat Selo saha masyarakat Boyolali umumipun. Pramila Upacara Tradisional Sedekah Gunung ingkang mujudaken tilaranipun para leluhur katindakaken kanthi turun menurun lestantun dumugi sakngriki lan saklajengipun minangka ikhtiyar nglestantunaken budayanipun para Leluhur.

Wonten ing sebrang lor pesisiran ing Pati wonten desa ingkang anggadhahi asma Kajen. Sakmenika wonten ing desa menika kathah tiyang – tiyang saking pundi kemawon ingkang sami Ziarah wonten ing Makam Mbah Mutamaqin. Wonten ing makam menika boten nate sepen saking peziarah, dinten menapa kemawon. Senajan iku esok, awan, sore. Apa maneh wengi, boten nate sepi saking peziarah. Kemashuran Mbah Mutamaqin sampun boten dipunsepelekaken malih. Kathah ingkang maosake surat yasin lan maosake tahlil lan uga wonten ingkang ngapalaken Qur’an. Ugi wonten ingkang nyuwun ijabahe supados angsal kepinteran lan sapanunggalanipun.

Desa Kajen sakmenika asalipun saking mbah Mutamaqin. Kacariyos Mbah Mutamaqin anggadhahi pangingon inggih menika Jin ingkang kathah. Cekak cariyos, Mbah Mutamaqin tindak wonten ing Mekah dipungendong jin. Nanging dereng ngantos Mekah, jin menika nibakake mbah Mutamaqin wonten ing segara. Lajeng Mbah Mutamaqin pepanggihan kaliyan iwak ingkang ageng. Boten dangu Mbah Mutamaqin numpak Iwak ingkang ageng mau wonten ing lepen Nil. Lajeng Mbah Mutamaqin saged nglampahaken Kaji ngantos bibar.

Sakrampungipun kaji, mbah Mutamaqin boten angsal kendaraan kangge kondur menyang tlatah Jawi. Nanging penggalihipun mantep menawi piyambakipun saged kondur ing tlatah Jawi. Boten dangu, mbah Mutamaqin pepanggihan kaliyan tiyang wonten ing Mesjid. Dereng siyos maturaken menapa ingkang taksih dipunadepi, tiyang menika sampun ngertos piyambak. Mbah Mutamaqin manut lan mantep menawi menika pitulunganipun ingkang damel gesang. Mbah Mutamaqin dipunparingi pesen, “aja melek yen durung tekan lemah”. Mbah Mutamaqin merem.

Tiyang mau ngepruk Mbah Mutamakin ingkang taksih sila ngagem tongkat ingkang wonten ing astanipun. Lajeng Mbah mutamakin mletik aduh, tiba ing desa ingkang dipunwastani Cebolek (ingkang  artinipun ceblok lajeng melek). Lajeng mlampah terus ing arah kulon saking desa Cebolek lajeng netep ing ngrika.

Mbah Mutamakin netep ing kulon desa Cebolek menika kathah ingkang boten remen. Menapa tenan tiyang menika kaji ijen? Sampun dangu netep ing ngrika, Mbah Mutamaqin ngamalaken ilmunipun wonten ing ngrika. Lajeng sakdangunipun zaman, papan panggenan menika dipunwastani Desa Kajen ( Kaji Ijen), ingkang sakmenika dados kutha santri ing daerah menika. Cekak cariyos, ngantos sakmangke saksampunipun Mbah Mutamaqin ing sasi Sura. Saben setunggal Sura kathah tiyang ingkang ziarah ing ngrika.

Kapethik saking : http://sastra-jawa007.blogspot.com/2008/06/asal-mula-desa-kajen.html