Wangsalan

Wangsalan yaiku unen-unen utawa tetembungan kang saemper cangkriman kang batangane (wangsulane) wis sinandi ing wanda-wandaning tembung-tembung. Wangsalan kaperang dadi 6 yaiku:

1. Wangsalan Padinan

Wangsalan padinan yaiku wangsalan kang digunakake minangka pacelathon ing saben dinane, mula ana sing nganggo nyebutake batangane la nana sing tanpa batangan, amarga wong-wong sing padha krungu/maca wis ngerti maksude (batangane).

Tuladha:

Njanur gunung, kadingaren gelem mampir!

Wangsalan       : njanur gunung

Batangan         : aren

Tebusan           : kadingaren

Tembung njanur gunung iku arane aren, mula biasa dadi tembung kadingaren.

2. Wangsalan Lamba

Wangsalan lamba yaiku wangsalan kang mung isi batangane siji.

Tuladha:

Roning mlinjo, sampun sayah nyuwun ngaso.

Widheng galeng, tekamu apa padha rahayu?

Tembung roning mlinjo iku arane eso, mula bisa dadi ngaso. Dene tembung widheng galeng iku arane yuyu, mula bisa dadi tembung rahayu.

3. Wangsalan Rangkep

 Wangsalan rangkep yaiku wangsalan kang bisa batangane luwih saka siji.

Tuladha:

Jenang sela, wader kalen sesonderan

Apuranta, yen wonten lepat kawula

Tembung jenang gula arane apu, mula dadi tembung apuranta. Dene tembung wader kalen sesonderan arane sepat, mula bisa dadi tembung lepat.

4. Wangsalan Memet

Wangsalan memet yaiku wangsalan kang carane nggoleki batangane sarana ngonceki maksude tetembungane ambal ping pindho.

Tuladha:

Uler kambang, yen trima alon-alonan bae.

Tembung uler kambang tegese lintah, mula batangane dadi tembung satitahe. Tembung satitahe tegese ora ngaya, mung tumindak sakepenake bae, kanthi alon-alonan.

5. Wangsalan Edipeni

Wangsalan edipeni yaiku wangsalan kang mawa paugeran:

a. unen-unene kedadeyan saka 2 ukara (wangsalan rangkep)

b. saben ukara kang kapisan (yaiku isi wangsalan) mawa purwakanthi guru swara lan purwakanthi basa).

Tuladha:

Tepi wastra, wastra kang tumrap mustaka

Mumpung mudha, nggegulanga ngiket basa

Tembung tepi wastra  iku tegese kemadha, mula bisa dadi tembung mudha. Dene tembung wastra kang tumrap mustaka iku tegese iket, mula bisa dadi tembung ngiket.

6. Wangsalan ing Sekar

 Wangsalan kang mapan ana sajroning sekar/tembang.

Tuladha ana ing tembang Kinanthi:

Kinanthi linging pitutur

Kenthang rambat menyan putih

Awasna dipun pratela

Noleha wiranging wuri

Cecangkok wohing klapa

Kang dadi pathoking urip

Sajroning tembang ing dhuwur ana wangsalan, yaiku (1) kenthang rambat tegese tela, mula bisa dadi tembung pratela, (2) menyan putih tegese tawas, mula bisa dadi tembung awasna, (3) cecangkok wohing klapa tegese bathok, mula bisa dadi tembung pathoking.

Kapethik saking : Esensi Bahasa Jawa Kelas XI semester genap